Ottobre, le foie ingiallìsse
e 'l caro verde pian pian el sparìsse,
tutto el bosco cambia voce,
vien fate castegne, ua e panòce.
 
               'na olta panòce e fasoi se i sechéa sul biavèr
               quasi da sfondar anca el solér,
               adès tut va in frigo o in magazzin,
               basta tegnar 'na s-cianta de vin.

Co' la scienza e co'l progresso
el vin senza ua se pol farlo instesso,
cossì tanti i se permette
de farlo co' acqua e polvarete;

               un goto in pi' su 'na semplice festa
               e par oto di' tu te russa la testa,
               ma se tu'l beve al metanolo
               el pol farte voltar l'ocio e ciapàr el volo !

Nessun segue pi' le sane tradizion,
l'é finì l'epoca del vin bon
quande che la ua vegnia folada a piè nudi
par no strucàr i garnei crudi.

               No' era certo un gran problema
               quel de far la vendéma,
               tuti insieme come a far festa
               drio le piantade co' 'na secia o 'na zesta.

Compagnie allegre, grandi e cei,
tuti attenti a no' spandar garnei,
portando zeste co'l bigòl o  co' i bràs
par far el pien su'l càro co'l tinaz.

               All' ombria su'l cevedìn drio 'na siesa,
               ghe n' era el càro co' i bò che nell' attesa
               i magnea 'na brasada de erba o de fen
               'spetando che'l tinàs fusse pien.

Co' era sera dopo sena par far filò
tuti su la caneva co' un gran momò
a far de la ua 'na poltiglia
e bevendo vin vecio da un bocàl o 'na botìglia.

               El tempo giùst par la fermentazion
               entro su la tina co' le so' zarpe e i so' asnòn;
               gnente medesìne, ghente potàci,
               vin da leccarse anca i mostàci.

Quande su la caneva fea spissa el nas,
el vin l'era pronto de grado e fat:
ora giusta de vèrdar el spinèl
e impignir bot, damigiane e qualche caretèl.

               Quande che 'l spinèl finia de butàr
               bisognea tirar fora le zarpe e torciàr,
               menéa la manéta senza paura
               el pi' forte de bràs e muscoladura.

Co' le zarpe, sempre de scondiòn
su 'na scarpada o dentro su un casòn,
co' 'na caliéra o 'na pignàta
qualchedun fea graspa pura sana e profumata.

               Dala gente la vegnia ciamàda
               sgnapa da tròi e de casàda,
               bastea un biciarìn, no 'na scudèla
               par brusarte el gargàt o la budèla !