'Sto ano, inverno da poarét
cossì se la gode anca i osèi,
gnente neve e pòc frét
però el despiàs par i tosatèi.

               No' la va ben gnanca in montagna
               par i turisti e i sciatori,
               lassù la neve l'è 'na cuccagna
               e st'ano la va mal anca par lori.

Ani indrìo ogni staion
l'era tant pi' normal
frèt e neve a balòn
specie in quella invernal.

               Allora tuti intorno a 'na stua
               o a un bon soc sul larìn
               co' sora un pignàt de vin de ua
               o un bocàl da vissin.

Alla sera tuti su la stala
calda, bela granda o cèa
a contar storie o qualche bala
ma sempre de gente 'na marea.

               La stala la era calda co' poche spese,
               el calor lo féa le vache co'l so fià
               co'le buasse se stropea le sfése,
               e cossì passea l'iverno spetando l'istà.

Le femene ingrumade su un canton
a far calzet o altro rammendar,
co'l ciaro del lumin o del lampion
senza mai sentirle a lamentar;

               anca i omeni da n'altra parte
               co' 'na tola sui denòci
               in tre o quatro i dughea a carte
               e qualchedun tirea i oci.

I bòce presto i avea sono
e qualchedun dormia su la fenèra,
spés in brasso de so' nono
o su 'na criola par tera.

               I era inverni duri e tant frét
               però ghe n'era tanta allegria,
               ognun s'incontentea del so pochet
               e tutti se saludea par ogni via.

Co'l piovea o ghe n'era el giàs
lo stesso ghe n'era tant da far
tuti menea man e bras
a far 'na criola o un restel da pareciar.

               Ades tutti son trati sui schei,
               pi' che sia su la bulàda,
               no se varda pi' casa ne' tosatei,
               si e no che se salude par la strada.

Quasi quasi "la 'ndea meio co la 'ndea pedo"
ghe n'era pi' union e armonia,
ades anca chi no' vol ghe tol de medo
e addio ai bei canti e alla bela compagnia.