Istà caro, staiòn dele pi' bele
sol che te scota anca i pedòci,
giornade de oro par le tintarèle
e ociài mori par no' inorbirse i oci.

               Staiòn de ferie, montagna e mar,
               paesi e città che se desvòda;
               pi' nessun vol laoràr
               ma ciapàr el sol (cossì vol la moda).

Un tempo, pi' o meno a San Piero
de matina ben bonora,
le fameie par intiero
le 'ndea sui camp co' la messora.

               Tuti uniti e ben in riga
               a taiar forment de gran lena,
               star attenti a ogni spiga
               e 'ndar casa la sera co'l mal de schena,
 
gnanca voia de magnar bocòn
benchè ghe'n fusse stat pochet,
un magro piato de menestron
quatro foie de radici o polenta e fighét.

               'Lora le risorse le era poche,
               occasion chi pi' chi manco'
               su le grave a giovàr strope
               par ciaparse qualche franco.

Intant rivea el dì de la trebbiatura,
tute le fameie se dea 'na man
spesso fin a notte scura
magari anca fin a l'indoman,

               chi su la trebbia a butar do la fàia,
               qualchedun a téndarghe ai spigàz
               chi a far la méda o sistemar la paia,
               altri a pesar e portar via i sac.

Dopo tuti a far la "doccia"
chi su 'na secia, chi su un mastèl,
femene e omeni e qualche bòcia
qualchedun su la Curogna o su medo caretèl.

               Adès la trebbia se la varda dal cavedìn,
               co' le man incrosade drio la schena
               all' ombrìa co' un fiasco de bon vin,
               'spetando miodì o ora de sena.

Tempo indrio par scurir la pèl
bastea 'ndar a laorar in campagna
co' qualche arnese, sapa o restèl,
adès ghe vol el mar o la montagna !
 
               Finì le vacanze o finì le ferie,
               par chi torna a scola o al laoro,
               le cose se fa davvero serie
               se no tu se come un african de color moro !